Haofvaste-wandeling Sjpassemig

Initiator, organisator en opper-moeëlemaeker Roel Leers mit ozze Heëlesje Vastelavesadel, de Prinse Youri I en Jay I bie 't bild van d'r Lachende Eëzel.

Gister woar ’t haofvaste. Tied vuur ing wandeling langs bijzongere Vastelaovesplaatsje in ’t centrum va Heële. Vurrig joar houw d’r Roel Leers dit evenement vuur ’t iesj georganiseerd. Toen woar d’r Wim Frijns va RTV Parkstjad mit mikrofoon en lopende kammera d’r beij. Vier sjtonge mit twintig luuj te wachte bis ‘t 10.33 woar toen op ins ‘t allerhuugste bezeuk dat d’r Roel zich wunsje kòsz aa koam loope: d’r Stjadsprins Youri I EN d’r Jonkheedprins Jay I.

Mit ozze Vasteloavesadel koam hun familie-entoersaasje en d’r woare versjillende zängere, Nicole en Wiel van Harten Twieë, Peter van Rob&Peter en d’r Fonzarelli. Mer ooch ing jongdame die noa 45 joar Randsjtad truuk op ’t Heëlesje nest koam, twieë breur oeët d’r Amsterdamse Jordaan, woeëva inne al 30 joar in ozze sjtad wont en d’r anger juus ee joar en mieng gemütliche Vasteloavesvrung Ine en Franck, die d’r ummer zint went d’r get te doon is rongk hun fest, d’r in de Heëlesje Vasteloaveswelt zieër bekante en gesjetste Hans van der Logt, deë ozze verhoale weë meugelik kòsz aavulle, en nog ing paar anger luuj die mich joamer genog onbekank woare (en zint geblieëve).

Vier begòszte natuurlik bei d’r Eëzel. Roel vertelde dat deë op d’r Heëlesje Wink alle kante va de sjtad op vluug. D’r Hans sjprong al meteen beij en vertelde ‘t verhoal uuver het Chronogram op d’r sokkel. Doa is te leëze dat dit bild van d’r Cyriel Laudy heij i 1992 is geplaatsjt.

Op noa ’t Roadhoeës. Doa sjteet inne tekst op de moer. Ee groeët deel va ’t gezelsjap wist neet dat dit ’t Heëlesj Volksleed is. Dus kroog jekerinne ee bleëdje mit d’r tekst, de moeziek woeëd gesjpielt en d’r woeëd gans vuurzichtig gezonge.

'Stedemaagd-bei-gebrek-aa-beter' Marcel liest de wöad va d'r Sjluuteluuverdrach vuur de Prinse Youri I en JayI. Links heur tekst, rechts 't antwoad va d'r Prins, heij oeëtgesjproake durch Prins Youri I.

De trap op noa ’t Roadhoeësplein. Doa gong ’t uuver de Sjtedemaagd, die in vreuger daag vuur de Vasteloavend d’r Sjtadsprins vuur drei daag d’r Sjluutel va de sjtad goof. Zieë declameerde dan ee gedicht dat d’r toenmalige Kastieëlhier van Gebrook, d’r Bertus Aafjes, sjpesiaal doavuur houw gesjrieëve. Bie gebrek aan maagde in osz gezelsjap han ich toen mer dizze rol op mich genomme. Gelukkig houwe vier noeë waal twieë echte Prinse en kroog ich in ’t plat ee antwoad van d’r Youri.

Beij d'r Juul op de Twieëde Promenaat

Via de plaatsj die d’r Wiel Knipa missjien waal hat geïnsjpireert vuur zienge Lange Jan Marsj, Geleensjtroat/Honigmannsjroat (sjteet daorum dee fotograaf doa?) leepe vier noar d’r Juul, ut bild van Les Deux Garcon. Dizze letterlikke Winkbüll is vol va vasteloavessymboliek. Heë zjweeft ee bietje en kump zoeë los va de dagelikse zurreg. Ee touw hilt um aa geneet. Ziene kop is ee eëzelsmasker, woeëdurch hee onherkenbaar kritiek kin geave. Hee hat ing narrekap op en versjillende medailjes. Uuver d’r Juul is ooch ee kingerbook gemak (Bas Ortmans en Caro Dahlhaus) woeëmit ee gouw doel weëd gesjteund: leësbevordering beij jong kinger.

Luuj van d'r carnavalsverenein van d'r Mestreechse Club Mijnstreek, die heure narrentempel houw in café Schiffers. Va linksaaf: Leon Tans (deë twieë joar later Sjtadsprins va Heële zou weëde); Mietske I (Wevers), twieë onbekante, woeëva inne twieë eier vasthilt; meneer en mevrouw Maurer en nog inne onbekante

(foto familie Maurer)

Vervolges effe de bein d’rin. Met flinke passe noa de Sarool. Doa sjtopde vier effe vuur ’t vreugere Kaffee Schiffers, dat doavuur nog van d’r Lingeloof (Lindelauf) woar (n 48). Heij honge de sjun glaas-i-loeëd vinstere van de Winkbülle die noeë beij Pelt te bewongere zint. D’r zint luuj noch mit bezig genau oeët te zeuke wie dat mit die vinstere noë is geweës. Och kreeg Heële in diz wieëtsjaft in 1949 zieng ieëtjsje vrouwelikke prins. Sorry Femke I va de Eëkheure, mer ’t Mietske I (Wevers) van d’r Mestreechse Club Mijnstreek woar dich toch ech al 76 joar vuur (kiek mer noa de foto).

'Hinger Hergots vot'. Rechts op geneet ligk de plakkette vuur Paul en Leo.

Op weeg noa ‘Hinger Hergots Vot’ komme vier noch langs d’r winkel van de ouwersj van ’t Mietske, hook Oranje Nassausjtroat/Dautzenbergsjtroat woë vreuger juwelier Consten zoot. Beij ’t kruuts aangekomme wiest d’r Roel op de plakkette die doa op geneet ligk. Ee eerbetoon aan Paul (Münstermann) en Leo (Keularts) die d’r Heëlesje Vasteloavend neet alling mer Loemele hubbe gebrach mer zoeëveul mieë.

Um d’r ek sjtond vier nog effe sjtil bie het verdweene kaffee van d’r Heinz Paffen, De Blauw Sjuut bar. Bis in de joare zieventig vertrok heij vandaan ’t Heëlesj Narresjip vuur zieng dreidaagse toer. Aan de uvverzie ligk ’t noë gesjloate ouwe Grand Hotel. Doa woar bis vuur 10 joar mit de Vasteloavend immer veul te doeë. Veul luuj oeët de groep houwe doa noch gouw herinneringe aa.

Beij d'r Kuëb en d'r Sjelmetoere; d'r stjee vuur 'Spjass Begòsz in de Plaargats

Via d’r Sjelmetoere, deë noe leeëg sjteet, en d’r Kuëb, deë ing anger plaatsj wil (op ’t Sjelmeplei), leepe vier durch de ouw Passage, ’t Moorehookplei noa ’t end van de Plaargats. Doa ligk d’r sjtee va Sjpass Begòsz. Dizze sjpasskapel sjpilde ummer op ee muurke vuur d’r Bijsmans. Bei ‘t 11 joarig jubileum is dee sjtee doa gelag. Mer toen Bijsmans neet mieë woar en ut muurke gesjloopt woeëd, hant ze d’r sjtee in de Plaargats gelag.

't Ieërbetoeën vuur alle Winkbülle die d'r Vateloavend neet mieë op dizze welt viere.

Van doa oeët ginge vier noa de plaatsj woeë boeëte d’r Vasteloavend de mieëtste Winkbülle beij jee zint: d’r Kirkhof, deë aa de Oakerstjroat. Uuver het monument aa d’r igangk vertelde Hans van der Logt dat ’t ee ieërbetoeënn is aan alle Winkbülle en dat ’t ontsjtange is durch ’t joarliks gedinke van d’r plötsliche doeëd van d’r Telgenkamp mit de Vasteloavend, inne karnavalist in hart en neere en bekangk als inne van de breurs van Sporthuis Diana.

Op weeg noa d’r Oambusj hubbe vier nog efkes sjtilgestjange bie ’t graf van d’r burgemeester Van Grunsven, deë nieks va Vasteloavend mòsz hubbe en mit de drei dol daag ummer noa zie huuske in Zieëland gong, mer deë waal toesjtimmung goof vuur inne good georganiseerde boeëtevasteloavend en optoch; en bie ’t graf van ’t Leenie Reubsaet-Beckers, dat zich mit zieng Ertesoep-leëdje onstjerfelik hat gemak.

Saame zinge vier 'Mienge Aombusch' van d'r Wiel Knipa; d'r poal van de kapotte lamp (en de kapotte moeziek); de foto van de buure (Jan-Willem, bedank!)

Ozze hoalfvaste wandeling sjloote vier aaf bie ’t hertekamp en de kapotte lamp woeë vier alleneuj ‘Mienge Oambusch’ van d’r Wiel Knipa gans hubbe gezonge. Dat gong zoeë good dat de buure van de Oliemolensjtroat (d’r Jan-Willem Souren) vanoeët ’t good zimmer ing foto van òsz hant gemak.

En toen houwe vier doeësj. Veul doeësj. De letste besjtumming woar Café Pelt, woeë vier de glaas-i-loeëd vinstere koste bewondere en woë Prins Youri spesiaal vuur òsz ziene Vateloavessjlager Richtig Heële zong.

Doa noa woar ’t noch lang ‘Heëlesje Gemütlichkeet’ wat de klok sjloog, mit de jonge oeët d’r Jordaan d’r beij!

Konklusie vuur òsz: nächst joar wer!!! En dan hant vier zieker wer get sjuns vuur uch in petto. Zit ier dan d’r bei? Vier vreuje òsz.

Mer iesj nog 225 daag bis Oad op Nuuj en 335 daag bis d’r Vasteloavend.

Alaaf!

d'r Marcel Put

(oad-joebileum-prins va C.V. De Paljassen oeët Sjandele)